Colaisde a' Chaisteil
Clasaichean Oidhche
Tha a’ cholaiste ionadail stèidhichhte an Steòrnabhagh an Eilean Leòdhais a’ tabhann chlasaichean Gàidhlig seachdaine aig ìrean eadar-dhealaichte rè na bliadhna. Thar 8-12 seachdainean, tha na clasaichean a’ dol airson dà uair a thìde gach seachdain, a’ teagasg còmhradh agus gràmar bunaiteach airson suidheachaidhean làitheil. Tha clasaichean rim faotainn ann an Colaisde Bheinn na Faoghla cuideachd. Gheibhear tuilleadh fiosrachaidh bho: Colaisde a’ Chaisteil (Pàirt de dh’Oilthigh na Gaidhealtachd ’s nan Eilean), A’ Ghearraidh Chruaidh, Steòrnabhagh, Eilean Leòdhais, Fòn +44 (0)1851 770000
Pasgan Foghlam Fosgailte Gàidhlig aig Àrd-Ìre
Tha Colaisde a’ Chaisteil toilichte a bhith a’ tabhann a’ chùrsa foghlam fosgailte ùr Gàidhlig Àrd-Ìre (luchd-ionnsachaidh). Tha na stuthan a dh’ullaich a’ cholaiste aig ìre agus inbheachd co-ionann ri Ùghdarras Teisteanasan na h-Alba (SQA) ach ann an cruth foghlaim fosgailte ùr-ghnàthach agus sùbailte. Tha seo a’ ciallachadh gum faod thu ionnsachadh aig an taigh, aig àm agus astar a tha freagarrach dhut fhèin le fios gu faigh thu taic bho neach-teagaisg mar a chuireas tu feum air. Faodaidh an cùrsa leantainn gu teisteanas Gàidhlig Àrd-Ìre (luchd-ionnsachaidh), ach mur h-eil thu airson deuchainn a shuidhe, faodaidh tu obrachadh tro na h-aonadan sa phasgan agus gheibh thu teisteanas SQA airson nan aonadan a rinn thu. Tron chùrsa, a tha ann an earrannan cuspaireil, leithid Dreuchdan, Saor-làithean agus na Meadhanan leasaichidh an t-oileanach na sgilean cànain, èisteachd, leughadh, sgrìobhadh agus labhairt. Faodaidh oileanaich cuideachd litreachas ùr Gàidhlig a rannsachadh, bho ùghdaran leithid Iain Crichton Mac a’ Ghobhainn agus Iain Moireach. Gheibhear tuilleadh fiosrachaidh bho Angela Mhoireasdan, post-d: angela-morrison@lews.uhi.ac.uk, fòn +44(0)1851 770457
Foghlam Fosgailte Gàidhlig (Luchd-ionnsachaidh) Colaisde a’ Chaisteil: Saor-làithean
Eadar gu bheil thu ag ionnsachadh airson an teisteanas àrd-ìre no nach eil, faodaidh tu obair agus cur-seachad a cho-mheasgachadh le cothrom a ghabhail air Saor-làithean Bogaidh Innse Gall. Tha e an urra riut fhèin dè cho fada ’s a dh’fhuiricheas tu no an suidh thu an deuchainn fhad ’s a tha thu an seo. Tha na saor-làithean a dh’fhaodas a bhith bho 5 gu 14 latha a’ gabhail a-staigh 5 latha de chùrsa bogaidh Gàidhlig le tidsear sònraichte, trì uairean a thìde gach madainn sa chlas agus obair air sgilean còmhraidh a-muigh ann an suidheachaidhean nàdarrach Gàidhlig gach feasgar. Bidh na saor-làithean a’ co-fhreagairt nan iarrtasan agus nam feuman agad fhèin agus a’ gabhail a-steach; teagasg bho Òraidiche le teisteanas Gàidhlig, faradh dùbailte air plèan no aiseag, leabaidh is bracaist, biadh meadhan-latha, cur-seachad agus còmhdhail eadar an àite-fuirich agus an clas. Gheibhear tuilleadh fiosrachaidh bho angela-morrison@lews.uhi.ac.uk, (fòn: +44(0)1851 770457).
|
