Ceolas
Bi nad phàirt den Ghàidhlig, den cheòl, den danns agus den àite! ’S e sgoil shamhraidh shònraichte a th’ ann an Ceolas ann an coimhearsnachd Ghàidhlig Uibhist a Deas an Innse Gall. ’S e ceòl agus dannsa a th’ anns an sgoil shamhraidh, Ceolas, le luchd-teagaisg a tha fìor eòlach air a’ phìob, an fhidhill, seinn, rìdhlean Albannach agus Cuadrailean, Dannsa Ceum agus Gàidhlig. Tha Ceolas a’ rannsachadh nan ceanglaichean cudthromach eadar ceòl traidiseanta, òrain Ghàidhlig agus danns an Alba le mòran dhiubh a’ gabhail àite aig cèilidhean agus sna dachaighean, far an do thòisich iad.
Tha a’ Ghàidhlig na h-eileamaid chudthromach de Cheolas, agus de dhualchas Innse Gall san fharsaingeachd. Tha Ceolas a’ teagasg cànan agus dualchas na Gàidhlig aig diofar ìrean comais - le clasaichean do dhaoine air ùr thòiseachadh, luchd-ionnsachaidh agus fileantaich. Tha an eileamaid seo a’ cuideachadh le tuigsinn buaidh na Gàidhlig air òrain agus danns.
Sa chumantas, tha an teagasg eadar 9.30m agus 4.30f. Às dèidh sin tha roghainn aig na com-pàirtichean. Tha prògram beothail aig Ceolas air an iomall, a’ gabhail a-staigh cèilidhean, cuirmean ciùil coimhearsnachd agus dannsaichean. Tha na ‘cèilidhean taighe’ sònraichte, far am bi luchd-teagaisg, com-pàirtichean agus muinntir na sgìre a’ cur seachad na h-oidhche a’ seinn, a’ danns agus a’ cluich ciùil ann an dachaighean san sgìre.
Mur cuala tu a-riamh roimhe an seanfhacal Gàidhlig "Thig crìoch air an t-saoghal ach mairidh gaol agus ceòl" bidh thu ag aontachadh ris an fheallsanachd aige mun àm a thig crìoch air seachdain Ceolas.
Tha Ceolas ann san dara seachdain den Iuchar gach bliadhna. Airson tuilleadh fiosrachaidh faic www.ceolas.co.uk no cur post-d gu: info@ceolas.co.uk
|
